Antu Dalam Budaya Raban Bansa Iban

Panyun jaku

Sekali tu aku deka ngupas enggau ngelansa sentang pengarap mensia sentang antu kelebih agi ba raban bansa Iban. Antu seruran digambarka baka pendiau mensia, tang suah agi dikumbai utai ti ludas, bekilat sereta bekabus. Antu nadai ngembuan batang tubuh fizikal baka kitai mensia. Kadang-kadang kitai semina meda senayau sida, tang dalam fenomena baka bunyi, pemindah sesebengkah objek enggau aktiviti-aktiviti bukai sereta enda ngembuan dalih ti logik. Pengarap ngagai antu endang udah lama bisi dalam semua budaya di dunya tu.

Di barat, komuniti sida pechaya endang bisi antu besaruk enggau raban mensia. Antu dianggap sida nya roh ti enda likun lalu seruran datai ke dunya tu ketegal pengidup sekeda individu nya ti bedosa sereta enda nerima pemati sida. Kadang-kadang antu dipeda bisi ayan sesegau di langit enggau nadai temu tuju. Nitihka pengarap raban sekeda nya madahka antu tauka roh jai nya anak mit ti baru ada ti diau di entara serega enggau neraka laban enda dibaptiska.

Dalam budaya Asia, mayuh orang pechaya ada baru sepengudah kitai mati. Antu nya roh ti enggai ” dikitarka baru” ketegal semengat sida enda selamat. Dalam adat asal bansa China, antu ulih nyadi tetap enggau setengah petara  tauka iya mega ulih ke neraka lalu betapi enggau pemerinsa sepemanjai maya. Orang China mega pechaya antu bisi kuasa diadaka baru dikena nebus penyilap sida ngelama tu.

Dalam agama Hindu , penerang ti lenak sentang antu bisi diterangka dalam “Garuda Purana “, siti kitab ari ” Vedik ” tradisyen. Kedua-dua Barat enggau Asia bekunsi pengarap ti sama pelasar sentang antu. Iya nya, antu seruran segau-segau ba endur sida ke udah nadai. Tempat-tempat ti baka tu dikumbai ” rumah berantu “, lalu pengawa sida sida nya selalu ngeregau tauka ” ngantu “ orang ke agi idup.

Besenutuk enggau pekara tu, nitihka pengarap Buddha, sida ngaul-gulai konsep rampa dunya antu lapar. Utai ba rampa menua tu dikumbai ” antu lapar ” ketegal sida ditan di dunya tu. ” Asuras ” mega dikumbai ” antu beperang “.

Dalam raban bansa Iban, leka jaku antu tu endang udah lama bisi kenyau ari sida ke ngemeranka pengarap animisma kelia. Nya alai, batang kenang kesekali tu nguji ngupas enggau ngelansa sentang antu dalam budaya raban bansa Iban ti disidi nengah pansik librari.

Batang kenang

Dalam budaya raban bansa Iban, antu tu besai bendar reti sereta balat dikenakutka sida. Nembiak ke agi mit endang suah diemba enggau jaku antu ngambika sida ngasika orang tuai. Pia mega kelia pendam orang Iban sigi digaga jauh ari genturung pendiau sida nangika antu ngeregau sereta ngachau pengidup sida ke agi idup. Nitihka pengarap raban bansa Iban bisi dua bansa antu iya nya antu jai engggau antu manah. 

Keterubah tu kitai meratika antu ti dikategorika antu jai. Raban bansa Iban pechaya antu jai bisi ba sekeda endur baka ba pendam, ba kayu kara enggau ba endur ti bukai. Antu jai kenu ku bala Iban tau ngerusak tauka munuh mensia. Sekeda ari bansa antu jai nya nyengkaum antu buyu, antu gambi, antu gerasi, antu kamba enggau antu kuklir.

Antu buyu nya antu ti ngachau orang indu tauka anak mit. Iya mega dikumbai enggau nama bera tauka libang. Tu antu indu ke alai indu ti mati beranak ngarung diri. Bisi mega orang ngumbai nya antu anak. Dalam pengarap lama Iban, antu buyu ngarung diri ba jelu baka jelu enturan, baya, lelabi, kijang enggau jelu ti bukai. Antu buyu bisi lima bansa. Bansa ti keterubah nya buyu anak. Buyu anak tu munuh anak mit ti bedau tumbuh ngeli.  Kedua nya dikumbai buyu asa. Buyu asa tu munuh nembiak indu ke bedau datai kain. Lalu iya ti ketiga nya buyu meruk. Antu bansa tu ngasuh raban sida ke indu nya kelebuan. Antu buyu keempat nya dikumbai buyu nyangkai. Antu buyu nyangkai tu ngasuh orang sakit lama meayu-ayu. Kepenudi nya buyu resa. Antu tu munuh indu ti benung betubuh bisi tauka ngandung. Buyu bisi ditemu diau ba rumah baka ba sadau, tempuan tauka kaki atap. Antu buyu tu ngeregau anak mit. Kelimpah ari nya bisi mega buyu tembawai. Tu semengat orang tuai ke udah parai ke nyadi buyu lalu diau sebelah-belah tembawai enggau endur ti bukai. Dalam pengarap Iban, semina manang aja teburu tauka tebunuhka buyu.

Antu jai ti kedua nya dikumbai antu gambi. Antu gambi ti bemunyi digak-digak iya nya munyi orang ke getar-getar chelap suah ngarung diri ba burung puk, ba tunggul kayu ti engkinjur tauka ba sekeda jelu. Pansik nadai mega madahka bansa jelu ti alai antu gambi tu ngarung diri.

Bansa antu jai ti ketiga nya antu gerasi. Antu tu besai, tinggi sereta mangah. Antu tu suah ngachau mensia. Dalam ensera Iban, antu gerasi nya belunchum pala sereta ngembuan dilah ti panjai sampai ke nyau ulih dibelit iya ba pala nyadi labung. Bisi mega orang ngumbai nya antu gerasi papa. Antu gerasi papa diau kediri-diri lalu nadai tau beranak. Nama bukai antu tu iya nya gerasi girau gerawan.

Nangkanka tu iya nya antu kamba. Antu kamba nya antu mit ke selalu mai orang tesat. Kenu ku orang tuai, lebuh bejalai dalam kampung kitai dilalau anang enda bepatahka pating daun kayu dikena ngelaika jalai enggaika kitai tesat ditabanka antu kamba. 

Sebansa agi antu jai nya antu kuklir. Tu sebansa antu ti dikenakutka orang lelaki laban anu iya ba pelir, nginsap darah dia. Kenu ku pengarap tuai Iban kelia, kuklir nya semengat indu ke mati beranak ti ngarung diri ba sekeda jelu baka enturun enggau landak. Iya nganu orang lelaki ke selalu agi lelaki ti udah nyadi ambai iya lebuh iya agi idup. Kukut antu kuklir nya panjai sereta ngeli iya juring tajam. Kuklir ngakak tauka ngekuk lalu kadang-kadang bemunyi rikut-rikut munyi indu manuk ti benung meramka telu.

Kelimpah ari rintai antu ti udah disebut di atas, sebansa agi antu jai nya dikumbai antu tuk tuie. Tuk tuie tu nyumbuh tunggal besai ti udah mati lalu mali diri nyadi antu gerasi. Kenu ku cherita, tuai nyumbuh tunggal nya muai tujuh lambar daun kara ari puchuk. Enti semua daun tujuh lambar nya enda beserara lebuh terengkah di tanah, dia iya nemu diri udah bebali nyadi antu gerasi tuk tuie.

Raban bansa Iban mega ngembuan pengarap antu jai tau mega ngarung diri ba mensia. Sekeda antu ti dikumbai Iban ngarung diri ba mensia nya nyengkaum antu engkerasak, antu kepapas, antu rua enggau antu tisil.

Antu engkerasak nya antu ke ngasuh iban udu berandauka orang. Engkerasak ke bendar tu sebansa burung. Nya alai bisi sempama Iban ti bemunyi tu; pandak mulut engkerasak panjai mulut kitai. Amat mih mulut engkerasak nya panjai tang mulut mensia ti becherita pasal orang bukai nya kiraka panjai agi sereta impak negatif iya balat agi.

Nangkanka antu enkerasak nya antu kepapas. Antu kepapas nya antu ke ngasuh iban kepapaska orang. Nya alai Iban bisi jaku: baka tegar ke makai besi, baka nya mega antu kepapas makai orang ke kepapas. Kitai enda nemu pengamat bala Iban ke kepapaska pangan diri. Kepapas nya asai ati ti enda lantang tauka begedika orang ketegal ti alah pemisi, pemandai, pemajik, penyigat etb. Sida ti kepapas tu ngembuan ulah ti rindu meda orang tusah, enda mujur enggau ti bukai.

Bansa kedua penudi nya antu rua. Antu rua tu antu ke ngasuh Iban rua enggau pemisi. Nya alai dalam budaya raban bansa Iban maya bisi pengawa tauka gawai sida endang suah ngagihka pemakai tauka ai irup ungkup antu rua, antu rangka. Dulu suba utai tu dikumbai piring penagang diberi ngagai antu rua ti diengkah ba atas keresang ba pun jalai enggau siti ba atas keresang di ujung jalai. Enti di rumah panjai, sida selalu muai pemakai tauka ai irup ke baruh rumah tanda pemeri sida ke antu rua. Sebedau muai pemakai sida selalu nyebut, “Tu nya, untung antu rua, antu rangka. Enggi kami anang kita agi minta, anang agi nanya. Utai tu bai nuan pulai ke Brunai, ke tasik besai, bai pulai ke Sintang ke Tawang.”

Kepenudi nya antu tisil. Antu tisil nya antu ke ngasuh Iban miskin enda tulihka utai. Reti tisil dalam konteks tu nya enda tulihka utai, jai nasit tauka sial. Antu tisil nya antu ti tau ngasuh tisil. “Nama-nama antu tisil dibai menantu iya nya ngagai bilik sida ke ngasuh sida enda kala agi bulih padi sekumbang udah datai iya.” Chunto jaku orang bukai ke orang sebilik ke enda bulih utai kenyau bisi menantu laban dikumbai bisi mai antu tisil.

Kelimpah ari antu jai, raban bansa Iban mega arapka bisi nya antu ke manah-manah. Antu manah dianggap sida diau di Panggau Libau, endur-endur ti tetap,  ba Batang Mandai tauka ba sebarang alai. Sida Iban mega arap antu manah tu tau nulung nyukung sida dalam pengidup.

Sekeda antu manah nya nyengkaum Sengalang Burung, Menjaya Raja Manang, Ini Andan, Sempulang Gana, Selempandai, sida Keling enggau Kumang sereta bala aki ini tauka kaban belayan sida ke udah nadai. Peratika penteba bansa antu ti manah nangkanka tu.

Ini Andan nya antu manah ti nulung Iban bejedian enggau pemakai sereta duit ringgit. Ini Andan nya gela indu tuai kelia ke dipechayaka diau di langit. Nya alai dalam ensera Iban suah bendar besebutka Ini Andan; Ini Andan ke diau di bulan ke suah mega disebut Ini Inda Rabung Menua, Ini (ini’) Ini Rabung Hari.

Nangkanka Ini Andan nya Keling ti suah dikumbai Keling Gerasi Nading Bujang Berani Kempang, Jelingau ke Betugau Mayuh Rambang. Keling tu siku lelaki antu ari menua ti dikumbai Panggau Libau. Iya tu sigat gamal sereta berani tajam ati. Iya dianggap raban bansa Iban nya Petara laban suah nyemia nulung Iban. Bini Keling nya Kumang.

Kumang mega dianggap raban bansa Iban nya antu ti manah laban Kumang enggau bala iya nulung bala indu Iban nemu nakar ngar, nemu nyikat ngebat. Iban arap bendar Kumang tu antu indu tauka Petara ti nadai penimpang dalam pemansang selangkuh tubuh, pemintar, pemandai enggau pengelandik gawa. Iya mega diberitaka bajik gamal, manah adat enggau basa, siru enggau orang sereta meruan jalai pendiau enggau pengidup. Kumang suah dikumbai Jawai Mensanggai Dayang Kumang. Menua alai iya ada disebut Gelong Batu Nakung Nyingit Nyingung Nyandar Nerabang.

Siku agi antu ti manah nya dikumbai Menjaya. Raja Menjaya nya siku ari menyadi sida Sengalang Burong. Sengalang Burong berunding mai orang mangun menyadi iya empu ke benama Menjaya jadi manang bali ngambika bisi ngubat bini Sengalang Burong empu ke benama Indai Kechendai Bepantak Jirak, Dara Sentaba Balun Kupak. Bini Sengalang Burong tu tak seruran mayur-ayur tabin bebirin lembau makai, pedera renga lain asai, sakit lengit enda nyamai (Sandin: 1964). Udah dibangun Raja Menjaya lalu dikumbai Manang Bali menyadi Aki Sengalang Burong, kedua bali nama Matai Tuai Raja Menjaya, Manang Langgong Ngembuan Puchong Penyangga Nyawa. Pengawa mangunka Raja Menjaya tu dipejalaika ba tuchung Bukit Rabong, iya nya entara menua Sarawak enggau Kalimantan, menua raban bansa Iban kelia. Udah dibangun, Raja Menjaya lalu betawaika bini Sengalang Burong. Tawai nya pengawa manang ngubat orang ke sakit. Udah betawai, bini iya pan lalu gerai. Udah ke gerai, iya lalu beranak ke empat iku anak. Kenyau ari nya raban bansa Iban arapka Antu Menjaya nya antu ti nulung ngeraika Iban ari penyakit. Tu mih keterubah raban bansa Iban berengkah nemu bemanang. Kenyau ari nya mega semua manang ke dibangun nya ukai ari perintah Raja Menjaya tang ari mensia empu, iya nya ukai ketegal kena kangau antu tang ari runding diri empu.

Udah nya bisi antu ti dikumbai antu Selempandai. Tu antu diarapka Iban nempa mensia. Iya mega baka antu manah ke bukai diau di langit. Bali nama iya nyengkaum Selempatah, Selempatih, Selempeta, Selempetah enggau Selempetuh. Nitihka pengarap Iban, Raja Selempandai tau begulaika tanah perai nyadi kerigai anak mensia, Raja Selempeta tau nempa teruba iya, Raja Selempetuh tau ngambuh tubuh mula ada.

Sebansa agi antu ti manah nya dikumbai Sengalang Burong. Sengalang Burong tu antu manah ti pemadu dipebasa sereta pemadu tinggi dalam pengarap Iban. Iya ngibun sereta nulung Iban lebuh sida ngayau. Iya enda tau alah maya beperang lalu ngena jaku ajih aja tau nyaup sida Iban ngalahka munsuh. Nitihka siti cherita, mula iya kelia, gawai Iban enda mayuh macham kelebih ari makai enggau ngirup, taja pan sida baru pulai ngayau bulih pala. Hari siti, siku tuai mai bala orang begawai maya bulan kembung. Iya lalu ngangau orang ngabang. Lebuh nya datai Sengalang Burong lalu ngajihka langit petang taja pan maya nya bulan kembung. Pengabang bukai lalu enda ulih datai. Ngena peluang nya, Sengalang enggau bala iya ari langit lalu datai. Orang ti begawai nyau tekenyit meda bala iya enggai niki rumah sida. Sida semina deka niki udah tuai gawai setuju nyediaka jani dikena ngenselanka penatai sida. Sida pengabang dipeda orang lembau amai makai enggau ngirup. Udah nya tuai gawai enggau bini iya lalu luput. Bala manang ti bisi enggau ngabang nyau nguji ngubat seduai iya tang enda ulih. Udah nya orang bukai mega luput. Nyau kelama nya baru bala sida dipuchau Sengalang Burong lalu suman. Dia Sengalang Burong lalu ngajar sida iya madahka sida enti enggai ditinggang penusah maya begawai, sida mesti ngenselan bala pengabang enggu darah jani tauka darah manuk. Kelimpah ari nya piring mesti udah disedia lebuh sida ke tanju. Keresa mesti chukup lalu gendang pepat mesti ditabuh. Lebuh sida meda iya lebuh iya ngambi gambar burung lang, sida mesti ngetu nempap gendang pepat lalu pulai ke ruai. Udah nya baru gawai tau dikumbai tembu. Udah meri jaku ajar, Sengalang burung enggau bala menantu iya lalu mali diri nyadi burung lalu terebai pulai. Iya empu mali diri nyadi lang. Nama Sengalang Burong Endu Sudan Berinjan Bungkong Endu Diu Tiung Menyelung. Nama iya udah ditukar laban lebuh agi biak iya bisi sakit lalu dipemanang. Nama iya ditukar awakka antu ti mediska iya enda ngelala iya agi lalu enda ulih ngachau agi. Nama dulu iya Indai Kechendai Bepantak Jirak Dara Sentaba Balun Kupak.

Udah nya antu ti benama Sempulang Gana. Iban mega arap bendar ke antu tu laban iya nguasa tanah enggau pengawa bumai betaun. Iya ngembuan mayuh nama nyengkaum Sempulang Gana Biak, Sempulang Gana Tuai, Sempulang Gana Kayung. Nyadi Sempulang Gana tu mega digelar Raja Sua. Iya dikarapka bansa Iban kenyau ari asal kelia bekuasa atas pengawa betanam betupi ke nyadi batang pengidup enggau penatai pemisi bansa Iban. Kebuah pia, laban iya ngembuan pesaka tanah dapur, untung iya lebuh sida menyadi bedua reta tengkira sebedau sida beserara pendiau ari pangan diri kelia. Nambahka nya, iya mega jadi enggau anak Raja Semarugah ke ngembuan gemala ati tanah, lalu nguasa semua tanah, ti ngasuh iya disembah ngena piring ading lebuh Iban ngereja pengawa ba tanah. Nyadi penatai Sempulang Gana nya ari Raja Durong ke bejuluk Lumpung Tibang Bebaring, Durong tuai ke berumah di tatai belakang tinting. Iya bebini ngambi Endu Dara Talun Pelangka ngemataka kuta dinding hari, Endu Cherembang Cheremin Bintang Tukuh Lawang Pinggai Bekaki, lalu iya mega digelar orang Endu Sabaku Techabut Sumping ngembuan taring ubat kelia, Endu Iyak Jelapa Pirak ngembuan kutak ubat lama. Seduai iya beranak tujoh iku, lalu Raja Sempulang Gana tu anak seduai ke biak ke sida menyadi. Nyadi sekali Sempulang Gana pegi ngiga orang ke bisi ngembuan leka mengkenyang. Nyau kelama iya udah belayar di tasik, iya lalu datai ba menua siti ke benama Gelenggang Gumbang muat, Kerimpak Guong Silat, di kaki pasir entap ke tau alai bemimpi nyadi kenyap, ngasuh orang terangkat jadi raja. Menua nya dipangkang Endu Kelinah ke terubah nemu jalai idup, kedua bali nama iya Endu Kaul Kawa Penyangga tulang lembut. Ba iya dia Raja Sempulang Gana bulih leka mengkenyang. Nyadi leka mengkenyang tu beguna bendar, laban iya jadika sulu padi tumbuh ba umai ari pesan Sempulang Gana empu kenyau ari iya ke bulih pesaka nya ari Endu Dara Kelinah kelia. Nya kebuah lebuh bansa Iban bumai, sebedau padi ditugalka ba tegalan, dia mengkenyang dulu ditanam sendi selepak panggal benih. Mengkenyang tu mali disingkang enggaika burut enti orang nya lelaki, lalu tara enti orang nya indu. Lebuh mengkenyang ditanam di umai, enti iya pisit bebungai, nya madahka pemanah padi taun nya. Enti iya bebungai engka sekali aja, nya madahka padi enda tentu berapa buah. Mengkenyang orang ke enda kala bulih padi endang enggai bendar bebungai. Semua Iban ke bumai endang nitihka ajar Sempulang Gana. Sida nyembah iya belama-lama lebuh sida manggul sereta lebuh padi sida sakit balat. Baka nya mega enti sida suah enda mujur taun, sida nirika gawai ke dikumbai Gawai Batu awakka Sempulang Gana mela batu umai sida. Nyadi enti padi sida sakit, dia Iban endang mela iya enggau gawai ke dikumbai sida Gawai Umai awakka Sempulang Gana ngeraika umai sida. Nya alai, lebuh ngereja pengawa gawai umai, dia orang ngambi lemambang mengap, minta tulung, minta sukung Sempulang Gana sereta enggau antu enggau lulu.

Sebansa agi antu manah ti dikarapka raban bansa Iban nya antu ti dikumbai Anda Mara. Anda Mara nya antu ke nyaga pengeraja Iban. Dalam leka sampi tauka pengap lemambang suah nyebut Anda Mara nya Anda Mara Raja Pengibai.

Antu manah ti kepenudi bendar dalam raban bansa Iban nya aki ini enggau kaban belayan sida raban bansa Iban empu ke bidik lansik, kaya raja, gerai nyamai tauka ke pandai di chunggai jari tiga. Sida tu mega suah dikangau dalam leka sampi ke alai bala Iban bepintaka reta tengkira, duit ringgit sereta pengerai.

Penutup kenang

Pengarap ngagai antu endang udah lama bisi dalam semua budaya di dunya tu enda ngira nya ari barat, menua China, timur tengah, Asia sereta pengarap Hindu enggau Buddha. Dalam raban bansa Iban, leka jaku antu tu endang udah lama bisi kenyau ari sida ke ngemeranka pengarap animisma kelia. Taja pan batang kenang kesekali tu semina ngupas enggau ngelansa sentang antu dalam budaya raban bansa Iban ti disidi nengah pansik librari tang penulis ngarapka mayuh agi raban bansa Iban tauka orang bukai betungkapka pekara tu enggau lenak agi jemah ila.

Kereban Sanding:

Benedict Sandin (1964), Raja Durong, Borneo Literature Bureau, Hong Kong.

Nalong Anak Buda, Johnny Anak Chuat (-), Gempung Jerita Tuai Bansa Iban Edisyen II, Pegari Iban Production, Bintulu

https://gnmawar.wordpress.com/the-house-of.../raja-sempulang-gana

https://ibanpedia.wordpress.com

https://ibanology.wordpress.com

https://uchutedung.blogspot.com/manang

www.ancient.eu/ghost

www.paranormal-encyclopedia.com